Tentang MPKAS dan MAPPAS

Assalamualaikum w.w. Sekedar latar belakang tantang MPKAS dan MAPPAS. MPKAS didirikan untuak manampuang kepedulian  dan kerisauan pak Chaidir Nien Latief, SH, M.Si  (almarhum) taradok tasio-sionyo asset kereta api di daerah Sumatera Barat, nan alah dihantikan operasinyo sajak habihnyo batu baro di Ombilin/Sawah Lunto. Baliau salain mantan Kapalo PJKA Sumatera Barat, Jawa Tengah, dan Sumatera Selatan, juo pernah jadi salah satu direktur di PT KAI. Karano urang gaek ambo adolah urang kereta api, sahinggo ado kaitan bathin jo masalah perkeretaapian, mako sacaro pribadi ambo fasilitasi pertemuan pembentukannyo di kantua Komnas HAM.

Insya Allah MPKAS bisa tabantuak dan bafungsi karano dedikasi teman-teman sahobby, tamasuak nan ado di lua MPKAS.Walau baliau indak namuah ditampilkan, namun harus kito akui peranan Sanak Ir Yulnofrions Napilus sebagai Sekjen dan pengelola West-Sumatera.com. MAPPAS dibantuak sasudah MPKAS, sabagai karangko baoperasinyo kereta api. Kalau sebagai angkutan umum, alah lamo kereta api kalah dek bis, namun kalau dalam rangka pariwisata, indak ado nan mangalahkan kereta api.Samantaro alun ado urang nan labiah tapek untuak manjadi pimpinan, dalam rapek pembentukan MAPPAS, ateh permintaan nan hadir ambo basadio manjadi ketua, walau iko bukan ‘habitat’ ambo. Calak-calak kaganti asah, mananti tukang tibo.

Sangaik disadari bahaso dalam mandorong pariwisata ko paralu ado koordinasi jo instansi-instansi lain, baiak swasta maupun pemerintah. Tanyato masalah koordinasi ko sangaik sulik. Walau lai manggarik, tapi MAPPAS indak bisa lari sakancang MPKAS. Ambo mandukuang panuah diadokannyo konsolidasi kaduo limbago ko, tautamo karano sajak awal 2008 ambo sibuk sakali manangani masalah-masalah lain nan rasonyo indak kalah pentingnyo. Rasonyo alah tibo saatnyo ambo manyarahkan [baliak] tugas di MAPPAS ka nan mudo-mudo, baiak supayo ambo bisa  labiah panuah manangani duo bidang di ateh, maupun supayo garak MAPPAS bisa labiah kancang lai. Labiah capek labiah rancak.

Wassalam,

Saafroedin Bahar (L, masuk 72 th, Jakarta)

Dr.Saafroedin BAHAR Fri, 05 Sep 2008 15:12:03 -0700

Post navigation

Tinggalkan Balasan

Alamat email Anda tidak akan dipublikasikan. Ruas yang wajib ditandai *

five × five =