Cerpen : Romantisme Kereta Api

saya kutipkan kolom penyair Rusli Marzuki Saria yang dimuat di harian 
Haluan edisi Sabtu 16 Desember 2006 yang mengambil tema kereta api.
Parewa sato sakaki
(dari kolom Harian Haluan Padang)

Cuiik…cuiiik…Soh…soooh….soooh!

Oleh: H.Rusli Marzuki Saria

"Cuit…!"
Cuiiiit…..Cuiiiit……..Cuiiiiit….!"
"Soh…soh….soh…..sooooh……!"
"Mak Itam mandaki Anai."
"Malanguah!"
"Sasak angok Mak Itam."
"Mak Itam alah tuo, sajak akhia abad salapan baleh."
"Kutiko dibukak tambang Ombilin. Ba-a kaindak sasak angok Mak Itam, 
hampia duo abaaik umua Mak Itam."
"Cuit….cuiiit….cuiiiiiik!"
"Mak Itam sampai di Pasa Rabaa, Balari dilereng-lereng."
"Lereang jo pandakian. Marapi mangaluakan asoktaba. Marapi batuak-
batuak kutiko nagari susah. Sakali awanhitam mambubuang. Kapundan 
mangaluakan."
"Lereang malereang tibo di Batagak. Awan bararak ondeh Mai. Ondeh 
Mai. Takana si upiak jolong gadang. Rambuiknyo sahinggo batih. 
Marantau bujang dahulu. Tapian jo surau safang langang."
"Ondeh Singgalang Kariang. Stasiun Sungaibuluah. Kantang jo lobak 
sadang manjadi. Takantang den amai! Palobak den biai! Angin 
Singgalang barambuih manyalinok. Dibaliak-baliak-baliak Batang Agam 
nan mandarun. Lintuah den surang. Matohari sadang lindok. Padi di 
sawah sadang buntiang."
"Sawah bapetak-petak. Aia mahilia dibawah Ngarai. Sianok sadang 
sunyi. Jambak taruih ka Sitingkai lalu bakelok ka Kampuang Tabu. 
Takana amai nan sadang manga? Nampak-nampak tapi tilakuangnyo. 
Badasau kodek kain saruangnyo."
Cuiiit…..cuiiiiit…..cuiiiiit…..!"
"Soh….soooh…..sooooh….sooooooh!"
"Stasiun Tarok. Kureta api bajalan di nan data. Masinih membunyikan 
piluik. Tukang bandera ilia mudiak di rel kereta api nan basimpang."

Tahun 1950

Stasiun Tarok sangaek ramainyo. Bakureta api pa-I ka Padang. 
Barangkek jam anam pagi. Piluik kureta alah malanguah-languah. Wakatu 
kureta api kabarangkek la-i. Bajalan kureta api. Masinih mambunyikan 
piluik, tukang bandera manurunkan bandera. Stoplaat-stoplaat alah 
dilalui. Kudian tibo di stasiun Padangpanjang. Kureta api manunggu 
darisi dari Singkarak. Singkarak mandalo dulang. Awan bararak 
diatehnyo. Manurun Anai jo rel bagigi. Ondeh lasuahnyo!
Mak Itam mancuik, Mak Itam lapang dadonyo. Hilang sasak angoknyo. 
Karano manurun ka Kayutanam. Stasiun Kayutanam nan rami, banyak urang 
bajua talua abuih.
Dari Kayutanam, Sicincin kureta api balari di nan data. Soh…soh…
cuiiik!. Stasiun Lubuakaluang ramainyo tangahhari. Talua asin! 
Talua…..Talua asin! Pisang abuih! Stoplat jo stoplat dilalui sampai 
ka stasiun Tabiang. Mak Itam manunggu sanjo. Mak Itam sampai di 
stasiun Simpang Haru.
"Padang – Bukittinggi, 12 jam Mak Itam balari."
"Maso saisuak. Maso jayanyo Mak Itam balari. Sajak dibukak palabuhan 
Emma Haven. Taluakbayua lauiknyo laweh."
"Mak Itam tibo di Sawahlunto. Mak Itam mamuek batubaro. Mak Itam 
lansia dari Bukittinggi ka Baso taruih ka Titih – Simarasok, taruih 
ka Payokumbuah. Jauah – jauah nampak gunuang Sago mananti."
"Mak Itam cuik….cuiiiik…….cuiiiiiiiik!"
"Mak Itam so….soooh…….soooooh……..sooooooooh."


Padang, 10 Desember 2006
Eko Yanche
--
Ambo tamasuak nan baruntuang soal kereta api bantuak nan dicaritokan 
dek Rusli 'Papa' Marzuki Saria tu. Masalahnyo tahun-tahun tujuah 
puluah ampek, kureta api manjadi tampek bamain ambo. Bulan puaso tagia 
bana dek anak-anak joloang gadang macam kami untuk bagayuik di gurabak 
baro atau gurabak simin nan maangkuik simin dari padang ka payakumbuah.

Kampuang ambo antara Padang Panjang jo Bukiktinggi, persisnyo di Aia 
Angek X Koto. Di sinan ado ciek stoplaat tampek kami naik turun kureta.
Tangah malam mato ndak namuah lalok, pukua tigo ari ka siang tadanga 
piluik kureta. Ambo takana nomor seri lokonyo E 1303 (antah dima mak 
itam tu kini, mungkin alah dilebur dek urang jadi basi daur ulang)
Sadiah bana bunyi kureta mandaki antah ka tibo antah indak. Ado dua 
loko nan ambo ingek nan partamo E 1303 tu. Nan kaduo seri E juo tapi 
nomornyo ambo lupo. Bedonyo, E 1303 ciroboang asoknyo bulek, nan lain 
ciroboang asoknyo bantuak kapa kucuik sagi ampek.

Di kampuang ambo jaman japang ado nan talindih dek mak itam. Namonyo 
Mak Akuik. Mako satiok loko nan malindih Mak AKuik tu lalu di stoplaat 
Aia Angek, urang langsung mangecek, lah lalu kureta si Akuik. Co itu 
bana dakeknyo urang awak jo kureta.
--
Dicaritokan dek almarhum Bustanul Arifin Adam ka Ambo dua puluah 
tahun nan silam, diantaro karajo nan jadi kebanggaan di maso lalu 
adolah: karajo kantua pos, guru, kontroler kabun sarato DKA (zaman 
ulando disabuik SS, mohon dikoreksi kalau ambo kaliru)
Di DKA nan paliang tasabuik salin musinih adolah Angku Sep. Di zaman 
kemerdekaan namonyo Pak Ka-Es atau kapala stasiun. Itu urang nan 
paliang pantiang dalam perjalanan kureta. Kalau keceknyo ndak 
barangkek, mako ndak barangkek kureta. Bajuonyo pintalon abu-abu tuo. 

Ado salempang di bahunyo. Kupiah caronok sirah nampak gagah di 
kapalonyo. Di dadonyo ado duo tali. Nan ciek sirah nan ciek dari 
ameh. Nan sirah tali piluik. Nan ameh, rantai loji saku buatan swiss, 
biasonyo tampek urang maakurkan jam adolah jo jam saku angku sep itu. 
Di tangan suok ado sinyal (bendera dari kayu) warnanyo sirah. Piluik 
diambuih, musini mamarentahkan tukang baro manambah baro, lalu nyo 
agiah sinyal jawaban jo piluik juo tandao inyo alah siap barangkek. 

Bendera diayun, kuretapun mulai mamasuakkan stoom (uap) dari ketel ka 
dalam silider untuk manakan piston, sooooooh......, rel badanyuik, 
urang-urang di peron malambai-lambaikan tangan. Ado nan manangih 
malepeh sanak sudaro. Pamandangan tu acok ambo caliak di stasiun 
gadang di Padang panjang tahun-tahuan 69. Angku sep sudah tu bajalan 
lambek-lambek ka ruangannyo. Nampak bana di wajahnyo raso lega, lah 
salasai tugehnyo. Untuak urusan malapeh tu, alun pernah diwakil-
wakilkan ka nan lain.
--
Pada masa chlaas kedua, untuanglah kureta api di wilayah republik 
masih bisa jalan. Dicaritokan dek apak ambo, kutiko pai baparang dari 
Padang Panjang ka front Tapakis, Lubuk Aluang. Pasukan-pasukan 
batalyon merapi dikirim dari Padang Panjang. Padang hari sasudah 
sumbayang asa, tattara lah babarih masuk darisi. Ado juo nan maraok di 
gurabak lapeh (indak baatok)

Manjalang barangkek, stasiun padang panjang raminyo alahurabi. Induak-
induak, anak ngenek, urang-urang gaek bacampua baua. Tibo-tibo datang 
Tek Amah (Panggilan untuk Rahmah El Yunusiah, pendiri Dinniyah Putri)
manyarumbu ka muko. Urang-urang maagiah jalan untuak Tek Amah. Di 
peron tu Tek Amah bapidato baapi-api: "Wahai anak-anak ku, pai lah 
bajuang. Bunuah ulando! Maju kalian ka front! Maju! Jan babaliak 
pulang kalau kakalah! Anak-anakku, kami badoa untuak kalian, pailah ka 
front, usia ulando! Merdekaaaaa!

Tek Amah maacuangkan tangannyo sambia mambantuak tinju. Tentara nan 
ado di kureta mambaleh: Merdekaaaaa! Urang nan banyak manjawek pulo: 
merdeka!!!

Sudah tu, amai-amai bagaduru ka dalam darisi. Maantakan lamang, tapai, 
pinukuik, lapek bugih, karupuak, kue sangko, goreng pisang, rokok, 
timbakau sampai nasi ramas bagai. Itu manunjuakkan gadangnyo harapan 
urang nan banyak ka pejuang-pejuang awak nan kamanyabuang angok di 
Tapakih. 

Matoari mulai turun, angku sep maambuih piluik, kureta melakukan 
kompresi partamo untuak mamuta roda loko, siap-siap manuruni silaiang 
kariang....tuiiiiiiiiiit
--